’காலா’ திரைப்பட எதிர்ப்பிற்கு கர்நாடகா திரைப்பட வர்த்தக சபையே துணையாக இருப்பது ஆச்சர்யம் அளிப்பதாக நடிகர் ரஜினிகாந்த் தெரிவித்துள்ளார்.
கர்நாடகாவில் ’காலா’ திரைப்படம் வெளிவரும் போது, திரையரங்குகளுக்கு உரிய பாதுகாப்பு வழங்க வேண்டும் என கர்நாடகா உயர்நீதிமன்றம் அம்மாநில அரசிற்கு நேற்று உத்தரவிட்டது.
ஆனால் இதுப்பற்றி கருத்து தெரிவித்த கர்நாடகா முதலமைச்சர் ஹெச்.டி. குமாரசாமி, ’காலா’வை கர்நாடகாவில் வெளியிடமால் இருப்பதே நல்லது. தொடர்ந்து வெளியிட்டால் அதன் விளைவுகளை பட தயாரிப்பாளர்கள் சந்திக்க நேரிடும் என்று குமாரசாமி கூறினார்.
இந்நிலையில் இன்று காலை சென்னை போயஸ் தோட்ட இல்லத்தில் செய்தியாளர்களை சந்தித்த நடிகர் ரஜினிகாந்த், காவிரி விவகாரம் தொடர்பான கருத்து தனது சொந்த கருத்து என்றும், அதற்காக ’காலா’வை கர்நாடகாவில் வெளியிடமால் இருப்பது சரியல்ல என்று தெரிவித்துள்ளார்.
கர்நாடகாவில் காலா வெளிவரும் விவகாரம் குறித்து முதல்வர் குமாரசாமியின் சூழ்நிலை என்னால் புரிந்துக்கொள்ள முடிகிறது. ’காலா’ வெளியீட்டை எதிர்த்து போராட்டம் நடத்தும் கன்னட அமைப்புகள் என்னை வந்து நேரடியாக சந்திக்கலாம்.
கர்நாடகாவில் ’காலா’ படத்தை வீம்புக்காக ரிலிஸ் செய்யவில்லை; உலகம் முழுவதும் காலா வெளிவருகிறது. இதை அங்குள்ள மக்கள் புரிந்துக்கொள்ள வேண்டும். திரைப்பட வெளியீட்டில் பிரச்னை ஏற்படும் போது, அதை முன் நின்று சரிசெய்வது தான் திரைப்பட வர்த்தக சபையில் வேலை.
ஆனால் காலா பட வெளியீட்டு எதிர்ப்பிற்கு கர்நாடாக வர்த்தக சபையும் உறுதுணையாக இருப்பது ஆச்சர்யம் அளிக்கிறது என்று ரஜினிகாந்த் செய்தியாளர்கள் சந்திப்பில் தெரிவித்தார்.
இறுதியாக கன்னட மொழியில் பேசிய ரஜினிகாந்த் ”நான் எந்த தவறும் செய்யவில்லை, கர்நாடகாவில் ’காலா’ படத்தை பார்க்க பலரும் ஆவலாக உள்ளனர். இந்த படத்தில் பலரது உழைப்பும் அடங்கியிருக்கிறது. அதற்கு மரியாதை அளித்து கர்நாடகா மக்கள் ’காலா’ வெளியீட்டிற்கு ஒத்துழைப்பு வழங்குமாறு கேட்டுக்கொள்கிறேன்” என்று கூறினார்.
